Partia Demokratike i është drejtuar zyrtarisht Komisionit Qendror të Zgjedhjeve me një kërkesë për vënien në dispozicion të të gjithë dokumentacionit lidhur me procesin e votimit nga diaspora. Në fokus të kësaj kërkese janë votat e ardhura nga Greqia, për të cilat PD ka ngritur dyshime për manipulim, duke kërkuar që këto zarfe të numërohen të fundit.
PD kërkon nga KQZ dokumentacion të detajuar për:
- Verifikimin ligjor të mënyrës së identifikimit të votuesve të diasporës dhe marrjes së zarfeve me firmë dhe me kod sigurie;
- Inventarin e plotë të fletëve të votimit të diasporës të papërdorura, vendndodhjen dhe kushtet e ruajtjes;
- Numrin e fletëve të votimit të vulosura por të pashpërndara, përfshirë ato të fondit rezervë;
- Sasinë e zarfaceve A dhe B të papërdorura dhe vendndodhjen e tyre aktuale;
- Procesverbalet dhe akt-konstatimet që përshkruajnë saktësisht:
• numrin e zarfeve të dorëzuara nga KQZ tek DHL,
• ato të kthyera si të parregullta,
• si dhe ato të rikthyera nga DHL për arsye të ndryshme.
PD thekson rëndësinë e transparencës maksimale në këtë proces dhe kërkon që çdo fazë e administrimit të votës së diasporës të mbulohet me dokumentacion të plotë provues.
