Fituesi i edicionit të këtij viti të Eurovision-it, këngëtari austriak JJ, ka shkaktuar jehonë në arenën mediatike, pas një deklarate të drejtpërdrejtë ku kërkon përjashtimin e Izraelit nga gara muzikore e vitit të ardhshëm, që do të mbahet në Vjenë.
Në një intervistë për të përditshmen spanjolle El País, artisti që i solli Austrisë fitoren në Bazel, u shpreh hapur:
“Do të doja që Eurovision-i në Vjenë të mbahej pa praninë e Izraelit”. Ai kritikoi ashpër praninë e këtij shteti në një kompeticion që, sipas tij, pretendon të jetë “politikisht neutral”, ndërkohë që shpesh ngërthen tensione dhe pozicionime politike.
Thirrja e JJ vjen në një kohë kur presioni ndaj Unionit Evropian të Transmetimeve (EBU) po rritet. Shtete si Belgjika, Spanja dhe Gjermania kanë kërkuar më shumë transparencë rreth mënyrës së votimit dhe pjesëmarrjes së vendeve në konflikt. Kritikat ndaj përfshirjes së Izraelit janë bërë më të zëshme, sidomos pas ngjarjeve të fundit në Lindjen e Mesme, të cilat kanë ndezur reagime të forta nga opinioni publik dhe komunitetet artistike.
Artisti austriak ka vënë gjithashtu në pikëpyetje ndershmërinë e sistemit të votimit të Eurovision-it, duke e cilësuar atë si “jotransparent” dhe duke kërkuar reforma për ta bërë më të besueshëm dhe të drejtë për të gjithë pjesëmarrësit.
Kjo deklaratë ka hapur një debat më të gjerë mbi natyrën e vërtetë të Eurovision-it: a është ky një festival që i qëndron larg politikës, apo skena e tij është gjithnjë e më shumë e ndikuar nga zhvillimet ndërkombëtare?
Me sytë tashmë nga edicioni i vitit 2026 në Vjenë, mbetet për t’u parë nëse EBU do të dëgjojë thirrjet për ndryshim, apo do të vijojë me formulën ekzistuese. Në çdo rast, zëri i JJ-së i ka dhënë një tjetër dimension festivalit që historikisht është promovuar si festë e muzikës dhe unitetit evropian.
