Bashkimi Evropian ka përditësuar listën e vendeve me rrezik të lartë për pastrim parash dhe financim të terrorizmit, duke përfshirë emra të rinj si Monako dhe Venezuela. Vendimi, që pason konsultimet me Task Forcën për Veprim Financiar (FATF), vjen mes debateve politike dhe shqetësimeve për transparencën financiare.
Ndër vendet e shtuara në listë janë gjithashtu Algjeria, Angola, Bregu i Fildishtë, Kenia, Laosi, Libani, Namibia dhe Nepali. Këto shtete konsiderohen me mungesë të kontrolleve të mjaftueshme ndaj flukseve financiare të dyshimta.
Ndërkohë, nga lista janë hequr Emiratet e Bashkuara Arabe, Gjibraltari, Filipinet, Barbadosi, Xhamajka, Panamaja, Senegali dhe Uganda – vende që kanë ndërmarrë reforma dhe kanë rritur bashkëpunimin me institucionet evropiane dhe Europolin.
Megjithatë, vendimi i Komisionit Evropian ka nxitur diskutime në arenën politike, pasi Parlamenti Evropian ka kërkuar pa sukses që në listë të përfshihet edhe Rusia. Refuzimi është interpretuar si një kompromis nën presionin diplomatik nga grupi BRICS.
Përfshirja e Monakos – një qendër financiare luksoze në zemër të Evropës – ka nxitur reagime për rolin që luajnë juridiksionet offshore në fshehjen e kapitaleve dhe mungesën e transparencës në rrjedhat ndërkombëtare të parasë.
