Historia e dashurisë mes Joz Markut dhe Loredana Bratit, që nisi brenda shtëpisë së “Big Brother VIP Albania 4”, vazhdon të mbetet në qendër të vëmendjes së publikut edhe pas përfundimit të spektaklit. Të dy u dalluan për një marrëdhënie me ulje-ngritje, shpeshherë të shoqëruar nga tensione dhe ndjenja të forta, por që mbajti interesin e publikut gjallë deri në fund të edicionit.
Pas daljes nga shtëpia, marrëdhënia e tyre ka qenë e paqartë. Çifti nuk është parë më bashkë publikisht, ndërsa mungesa e Jozit në ditëlindjen e Loredanës, të festuar pak ditë më parë, ngjalli dyshime të forta për një ndarje të mundshme. Kjo mungesë nuk kaloi pa u vënë re nga ndjekësit, të cilët e kanë komentuar gjerësisht në rrjetet sociale.
Sidoqoftë, disa dedikime të fundit të Loredanës në rrjetet sociale kanë bërë që fansat të mendojnë se ndoshta marrëdhënia mes tyre ende nuk ka përfunduar. Nga ana tjetër, veprimet në Instagram kanë sjellë një tjetër shtresë dyshimi: Jozi ka hequr Loredanën nga lista e ndjekësve të tij, ndërkohë që ajo vazhdon ta ndjekë.
Për të shtuar më shumë konfuzion në lidhje me këtë situatë, së fundmi Jozi ishte i ftuar në një intervistë me gazetarin Gaz Ujkashi. I pyetur në mënyrë të tërthortë për marrëdhënien me Loredanën – pa u përmendur emri i saj – përmes një batute të përdorur brenda “BBV4”, Jozi zgjodhi të jetë i rezervuar.
Gazi: “Ti je i hapur? A do mbyllet kjo çështje në një moment të caktuar?”
Jozi: “Çështja e…?”
Gazi: “E ‘çupës së xhajës’”
Jozi: “‘Çupa e allës’… ka shumë për të folur, por dua të rezervohem pak. Gjërat janë mirë. Do ketë surpriza, te Jozi ka gjithmonë surpriza.”
Me këtë deklaratë të shkurtër, por të lënë në heshtje qëllimisht, Jozi nënkuptoi se historia mes tyre nuk është mbyllur përfundimisht dhe se publiku mund të presë zhvillime të reja. Nëse bëhet fjalë për një rikthim, një shpjegim apo një projekt të përbashkët, mbetet për t’u parë.
Për momentin, marrëdhënia e tyre mbetet një enigmë për publikun, ndërsa fansat vijojnë të ndjekin çdo lëvizje të tyre në rrjet, në pritje të një konfirmimi të qartë për të ardhmen e kësaj romance që nisi para syve të gjithë shqiptarëve.
